Նախագահութեամբ Հիւսիսային Ամերիկայի Արեւմտեան Թեմի Առաջնորդ` Գերշ. Տ. Յովնան Արք. Տէրտէրեանի, Երեքշաբթի 25 Փետրուարին Առաջնորդարանում գումարուեց Թեմի հոգեւորականաց Ընդհանուր ժողովը, մասնակցութեամբ Արեւմտեան Թեմում ծառայող հոգեւորականների:

Ժողովը բացուեց հոգեւոր արարողութեամբ եւ Առաջնորդ Սրբազան Հօր աղօթքով։ Ժողովը համընկնում է Սրբոց Ղեւոնդեանց տօնին, եւ Յովնան Սրբազանը նախ շնորհաւորեց հոգեւորականներին տօնի առիթով, ապա անհրաժեշտ ծանուցումներ ներկայացրեց թեմի ծրագրերի ու քայլերի մասին, որոնք բաւականին յագեցած են յառաջիկայ ամիսների համար, այդ թւում՝ նախապատրաստութիւն թեմի 100-ամեակին, սարկաւագաց դասընթացների կազմակերպում, թեմի հաստատութենական նորարարութեան ծրագրեր եւ այլն։ Օրուայ պատգամը փոխանցեց Արժ. Տ. Մանուկ Աւ. Քհնյ. Մարգարեանը։

Հոգեւորականաց ժողովն այս անգամ անցկացուեց նոր ձեւաչափով։ Օրակարգային հարցերը ներկայացուեցին չորս պանելային քննարկումներով, որոնց թեմաներն առնչւում էին հոգեւոր, եկեղեցական ու համայնքային ոլորտներին, որոնց շարքին՝ ծուխերում Աւետարանի քարոզչութեան վերարթնացում, Աստուածաշնչի գրագիտութեան բարձրացում, հովուական արձագանք ճգնաժամային իրավիճակներին, Արևմտեան թեմի նոր առաքելութիւնը։ Բանախօսները ներկայացնում էին նշեալ հարցերի շուրջ իրենց մօտեցումները՝ հենուած սեփական հովուական փորձի վրայ, ապա ծաւալուող քննարկման ընթացքում մասնկիցներն արեցին զանազան առաջարկներ։

Ժողովի քննարկումներն ամփոփելիս Առաջնորդ Սրբազանը նշեց, որ բարձրացուեցին բազմաթիւ օգտակար հարցեր, որոնց շուրջ քննարկումները պէտք է շարունակել նաեւ յետագային՝ յստակ ուղենիշներ ձեւակերպելու համար։

Սրբազան հայրը գնահատելով Թեմիս հոգեւոր հովիւների նուիրական ծառայութիւնը, նոր մարտահրաւէրների լոյսի տակ առաւել պատասխանատուութեան ու պարտաճանաչութեան յորդորներ ուղղեց իրենց, մասնաւոր տեղ տալով աստուածաշնչական սերտողութիւններին, մեր ծիսական արարողակարգին, ազգային ու եկեղեցական արժէքներին:

Հիւսիսային Ամերիկայի Արեւմտեան Թեմի հոգեւորականաց Ընդհանուր ժողովը փակուեցաւ Սրբազան հօր աղօթքով: Երեկոյեան Ս.Ղեւոնդեանց Մայր Տաճարում հոգեւոր հայրերը մասնակցեցին Ս.Պատարագի։

Դիւան Առաջնորդարանի

28 Փետրուար, 2024