Քրիստոսի ծնունդէն քառասուն օրեր անց Անոր ծնողները մանուկ Յիսուսը տաճար կը բերեն Աստուծոյ Սուրբ Խորանին ընծայման: Այս պատկերը կը ներշնչէ բոլորս եւ Անոր հետեւողականութեամբ դուք նաեւ սիրելի հայ ծնողներ Ձեր մանուկները իրենց քառասնօրեայ ծնունդէն յետոյ եկեղեցի կը բերէք Աստուծոյ Սուրբ Խորանին ընծայման: 

Ինչպէ՞ս բացատրել այս պարզ քայլը, որ ոչ միայն բարեպաշտական արտայայտութիւն մըն է, այլեւ խոստում մը ծնողներուն կողմէ, որ աճող մանուկին քայլերը պիտի առաջնորդեն Աստուծոյ:

Մեր առաջին պատգամն է, որ այս սրբազան աւանդութիւնը մնայ անխախտ մեր ազգի կեանքին մէջ: Աւանդութիւն մը, որ հարիւրաւոր տարիներու սրբութիւն կը կրէ իր մէջ եւ մեզ կ՛առաջնորդէ առ Աստուած: 

Տեառնընդառաջը ունի նաեւ երկրորդ պատգամ մը ուղղեալ հաւատացեալներուն, որ Ձեր կեանքի իւրաքանչիւր օրը վերածէք Սուրբ Խորանին ընծայումի օր, որովհետեւ բարեպաշտական այս արտայայտութեամբ մեր կեանքը կը դարձնենք դէպի Աստուած առաջնորդող ճանապարհ: 

Տեառնընդառաջի մեր երրորդ պատգամն է, որ նորապսակ զոյգեր, նոր նշանուածներ եկեղեցի յաճախելով հաւատարմութեան ուխտ կատարէք Աստուծոյ հանդէպ: Այս ուխտն է, որ Ձեր սրտերուն ու հոգիներուն մէջ ծրարած, լոյսը կը դառնայ Ձեր ընտանիքներուն: 

Մեր աղօթքն ու մաղթանքն առ Աստուած կը վերառաքենք, որ այսօրն ու ամէն օր մեր կեանքի ընթացքը դառնայ տեառնընդառաջ: Քանզի Աստուծոյ հետ կապուած կեանքը սուրբ է եւ Աստուծոյ ներկայութեան մէջ ըլլալով մեզ հեռու կը պահենք օտար խորհուրդներէ, որոնք մեր հոգին կը սպաննեն: 

Միասին աղօթենք Աստուծոյ, որպէսզի Անոր հովանիին ներքոյ դառնանք մաքուր ե՛ւ անձնապէս ե՛ւ հաւաքականօրէն՝ որպէս ընտանիք ընծայուած Աստուծոյ փառքին:

Տեառնընդառաջի օրուան խորհուրդով մենք մեզ պիտի պատրաստենք Մեծ Պահքի հոգեւոր ճանապարհորդութեան, որպէսզի աղօթքով, խոստովանութեամբ, հոգով ու սրտով մաքրուած, դառնանք ճանապարհակից Քրիստոսի, ու հոգեւոր վայելքն ունենանք Յարութեան հրաշալի խորհուրդին: Ամէն: 

Օրհնութեամբ՝

Յովնան Արք. Տէրտէրեան

Առաջնորդ՝

ԱՄՆ Արեւմտեան Թեմի

Տեառնընդառաջ, 2025